أحبك محشش .. مفرفش مطنش .. ودايخ مدروخ .. وآخر انسطال

أحبـك مكبـر .. دماغـك مخـدر .. ممشـّي أمورك .. كـده باتكال

واحب اللي ينصب .. واحب اللي يكدب .. واحب اللي ينهب .. ويسرق تلال

واحب اللي شايف .. وعارف وخايف .. وبــالع لســانه .. وكاتم ماقال

واحب اللي قافل .. عيونه المغفل .. واحب البهايم .. واحب البغال

واحب اللي راضي .. واحب اللي فاضي .. واحب اللي عايز يربي العيال

واحب اللي يائس .. واحب اللي بائس .. واحب اللي مُحبط .. وشايف محال

واحبك تســـافر .. وتبعد تهاجــر .. وتبعت فلوسك .. دولار أو ريال

واحبك تطبـّل .. تهـلل تهبـّـل .. عشان ماتش كورة .. وفيلم ومقال

وتبدأ تشاكل .. وتعمل مشاكل .. وتنكش مسائل .. وتسأل سؤال

وعايز تنور .. وعايز تطور .. وتعمللي روحك .. مفرد رجال

ساعتها هاجيبك .. لايمكن أسيبك .. وراح تبقى عبرة .. وتصبح مثال

هابهدل جنابك .. واذل اللي جابك .. وهيكون عذابك .. دا فوق الاحتمال

وامرمط سعادتك .. واهزأ سيادتك .. واخللي كرامتك .. في حالة هزال

وتلبس قضية .. وتصبح رزية .. وباقي حياتك .. تعيش في انعزال